प्रिय गाउले दाजु,

प्रिय गाउले दाजु,तिमीबाट टाढा, म आराम छु, ठिक छु । तिमी पनि ठिक होलाउ । गाउले दाई रमाइलो, घमाइलो गाउँसँग जोडिएकोले पनि मेरो तिमीप्रति सधै शुभकामना रहन्छ । महाभुकम्प आएर गएर सानासाना पराकम्पन आइरहदै गर्दा नयाँ वर्ष लागेको एक महिना पनि भैसकेछ । अब तिजको लहर आउछ वरी लै । हाम्री भाउजु, तिम्री पियारी, दुलही झैँ सिंगारीन्छिन् र माइत हिन्छिन् । उनी माइतमा व्रत बस्नेछिन् । तिम्रो लामो आयूको लागि । तिम्रो स्वास्थ्यलाभको लागि । तिम्रो उन्नती, प्रगतिको लागि । उनको भोकाएर न्याउरो अनुहार पनि तिम्रो हसिलो अनुहारको कल्पना गदागर्दै बदलिन्छ र मुस्कानले तेजिलो हुन्छ । नखाएर नातागतले कालो उनको अनुहार तिमीलाई सम्झेरै उज्यालो हुन्छ । अस्ति भर्खर जन्मिएकी छोरी काटीकुटी तिमी जस्तै छ दाई । बेलाबेलामा तिम्रो आवाज सुन्दै सानी छोरी हेरेर मात्रै उनी केही समय तिमीबाट छुट्टीएर माइतमा रमाइरहनेछिन् । तर के तिमी भाउजू नहुँदा अफिसबाट काम सकिनासाथ घर फर्कलाउ? अँह मलाई लाग्दैन जति भाउजु तिमीसँग समर्पित छिन् तिमी पनि उनीप्रति त्यतिनै समर्पीत छौं । तिमीलाई त लाग्छ, तिमी अलि बढी स्वतन्त्र छौं । चतुर, बलवान छौं त्यसैले घरको जेठो, बाठो हौं । कुनै व्यक्ति वास्तवमै हिरो होस््््् वा असल नेता वा जोसुकै होस् तिमी कसैलाई मान्दैनौं । को बुद्ध ? को गान्धी ? त्यो पनि तिमीलाई पर्वाह छैन । किन तिमीलाई यस्तो अनुभूति हुन्छ थाहा छ दाई ? तिमीलाई कोही पुज्छ, अरुले भन्दा एक पाइला अगाडि सरेर बुझ्छ, तिमीलाई छाता ओढाएर आफू रुझ्छ । त्यो “कोही” अरु कोही होइन तिम्रै जोई हुन्, हाम्री भाउजु हुन् । भाउजु नारी हुन् । जुन घरमा नारीको सम्मान हुदैन त्यस घरमा देवताले वास गर्दैनन् । छलकपटले उहाँको सम्मान हुदैन र श्रीमतीलाई छलेर बाहीर कसैसँग अनैतिक सम्बन्ध राख्न खोज्नु छलकपटको उदाहरण हो ।कहि कतै कहिल्यै तिम्रो बारेमा नराम्रो नसुनेको म तिमीले एकछीन भेट्ने कुरा गरेपछि म ससम्मान तिमीलाई भेट्न आएकी थिएँ । त्यसरी आएकी बहीनीलाई तिमीले कसरी वा कस्तो मनोभाव बोकाएर फर्कार्यौ ? थाहा छ दाजु? तिमी कसरी थाहा पाउथ्यौ ! अन्दाज गर्न सक्दैनौ न म त्यसबारे खुलाउनुको अर्थ देख्छु । तर तिमीले सेक्स्युअल ह्यारेसमेन्ट गर्यौ । त्यसैको प्रतिक्रिया म यो पत्र कोर्दैछु तिमीलाई सम्बोधन गर्दै । Young अवस्थामा यौनइच्छा सामान्य इच्छा हो । तिमी आफूसरहका साथीसँग यी विषयमा खुलेर कुरा गर्न सक्छौं तर बहीनीसँग हैन । नयाँ कुरा छन् भने घरका सदस्यसँग पनि सामान्यीकरण गरेर जनचेतनाका लागि भन्न सक्छौ तर म गाउले बहीनीलाई बोलाएर त्यस्ता कुरा गर्न त सुहाउँदैन भने यौनक्रियाकलाप त नसोच्दा पनि हुन्छ । किनकी दाजु, यो नेपाल हो र नेपाली संस्कार र संस्कृतिअनुसार यस्ता कुरा यहाँ अनैतिक हुन्छन् । म त झन् नेपालीपनले ग्रस्त छु र त यस्ता कुराहरुसँग त्रस्त छु । पश्चिमेलीको प्रभाव बढ्दै गएपनि त्यसैतरहले आफ्नो संस्कृति र संस्कार घट्दै गएको ठान्नु हुदैन । यो भ्रम हो । हो, यहाँ तिमीलाई लाग्ने इच्छा सबैलाई लाग्छ । तर कुन सन्दर्भमा कसको संगत, सहयोग आवश्यक हुन्छ ? बिचार गरेर हिड्नुपर्छ । नत्र तिमी मान्छेको रुपमा बोकोसरी हुन्छौं । तिमीसँग म राम्रोसँग बोल्थेँ किनकी तिमी पत्रकारीतामा मेरो लागि अग्रज थियौं, छौं । पत्रकारीता पढेको हैसियतले यस क्षेत्रमा अगाडि कसरी बढ्ने म सल्लाह लिन खोज्थेँ । तिमीलाई धेरै राम्रो पो सोच्थेँ त्यसैले पनि तिम्रै विनम्र आग्रहमा भेटेको थिएँ मैले । त्यहिबेला नै हिमालको हिउँलाई तातो हावाले पगालेझैँ पगालियो तिम्रो असल व्यक्तित्व, मेरो मनमष्तिस्कबाट । मेरो नजरबाट यसरी गिर्यौं कि तिमी सायद अब उठ्न सक्दैनौ । अन्तमा दाजु, चाहेर वा नचाहेरै तिम्रो मतिरको दाउ मैले बुझीसकेकोले एउटा कुरा भन्नु छ । तिमीजस्ता यौनप्यासीहरुको समूह बनाएर एउटा ‘वैधानिक र व्यवस्थित वेश्यालय खोल्नुपर्छ’ भन्ने आवाज निकाल र सरकारलाई दबाव देऊ आवाज सुन्न, गुन्न र कार्यान्वयन गर्न । आफ्ना मागहरु आफैले पुरा गर्ने त हो । तिम्रा ति यौन आवश्यकताहरुले उत्कर्षको रुप लिए भने वेश्यालय सही रुपमा काम लाग्न सक्छ । यौनतृप्ती खोज्दै तड्पीरहेकाहरु सबैले तिमीलाई धन्य भन्नेछन्, जय जयकार गर्नेछन् । यसले ठमेलमा लुकी लुकी वेश्याहरुले देहव्यापार गर्नु पनी पर्दैन । प्रेमको नाममा धेरै केटाकेटीहरुले यौनहिंसाको लेनदेन पनि गर्नुपर्दैन । हो दाजु, आफ्नो लागि त्यो बाटो सोच्यौ भने आफूजस्ताहरुको लागि पनि राम्रो होला की?

उही तिम्री गाउँले बहीनी